宜蘭自駕遊 (2014)－第四天

最後一天宜蘭遊，行程好簡單。響民宿食完早餐之後，就去左梅花湖。

遊梅花湖主要係租單車，有電動，亦有腳踩，都係家庭式單車多。馬Ｂ就揀左電動鴨鴨車，民宿俾左張九折卷我地，響一間叫Formosa的舖頭租。環繞湖踩一周應該大概半個鐘，但中途落車睇下鴨鴨，睇下海咁，一個鐘都有少少趕，但俾多個鐘又唔係好抵。大家要抓緊時間。

玩完湖後，就響湖邊的小熊書房食飯。呢間餐廳旅遊書都有介紹的。開頭我見佢咁平凡，唔期望食物好食，但又出奇地OK喎。其中一樣係煎三文魚扒（係叫俾馬Ｂ食的），煎得好滑，又夠味。

食飽飽後，本來想去多個叫幸福２０米的農場，但馬Ｂ瞓左覺，就放棄嘞。沿路上番桃園時，去左頭城博物館外面影相（個日係休息日）同埋轉左上山的金車城堡飲杯嘢。點知轉到上去話第一館無開，咁我地見時間又差唔多，於是就走啦。BB宜蘭！

去番桃園還車，四日只係用左半缸油。好抵！

宜蘭自駕遊 (2014)－第三天

臘藝彩繪館－富美活海鮮－饗宴

同小朋友去旅行，除左睇動物，真係無咩好做。宜蘭另一個為小朋友而設的地方，就係呢個響蘇澳的臘藝彩繪館。對比起牧場，呢個館的收費算貴，$200台幣一個人, 但其中$100可以當錢響個度買嘢。

入到去個館，係要跟設定的活動做，唔係任你自己玩的。

第一部分係填色

第二部分係做水彩筆（馬Ｂ太細，都係由我地做）

第三部分係做臘筆（我地揀色揀字款，由職員負責開機做）

第四部分係人體繪彩（我地無畫，哈，費事洗）

離開前就係小賣部，我地用左Ｄ錢錢買左浴室臘筆。

玩完就去食飽飽。跟網友介紹，去左蘇澳近海邊的一間海鮮舖，叫富美活海鮮，外面有泊車的地方。先響樓下點菜，我地叫左魚生片、蝦球、魚湯、菜。um...無下次囉～～

下晝返左民宿，先同馬Ｂ沖涼。跟住又開車去饗宴食晚飯。同民宿主人講開，佢地話我地食得咁講究，同埋呢間係好食的。去到已經見到好多靚車泊左響出面。原來呢間鐵板燒係貴嘢，兩個人食左$4400台幣！呢餐係馬爸爸請我食的，嘻嘻。

食物質素係無得頂。每上一道菜前，廚師都會先介紹，又會俾相我地睇。雖然每道份量唔算太多，但食下食下都好飽。有魚生、龍蝦仔、魚、蝦、帶子、鴨胸、和牛等，仲有甜品同嘢飲。廚師仲特登送左碗粟米湯俾馬Ｂ飲，又為佢炒碗無落ＸＯ醬的炒飯。呢間超級推薦！

宜蘭自駕遊 (2014)－第二天

宜農牧場－宜蘭山寨村 －幾米廣場－新月廣場－羅東夜市

正式開始宜蘭遊。第一個景點，係宜農牧場。入場費$20台幣一人，佢係行honor system，即自己響門口入錢，地方唔算大，一隻羊咩咩、三隻小豬隨地走。我地買左枝奶奶俾小馬Ｂ餵豬仔，樓上有羊欄，圍住的，可以餵羊。

去完牧場已差唔多到食飯時間，驅車去宜蘭山寨村。馬Ｂ都好鐘意入面隻紅色怪獸。山寨村門口係買不同手信的舖頭仔，亦有新鮮麵包賣。入面（經過怪獸胯下...)就係食飯的地方。餐牌上每碟餸的名都好特別。我地唔係太餓，最後點左一個pizza，一份炸雞粒，同兩杯果汁。果汁係用酒珵裝住架，好得意。Ｄ嘢食都幾好味！

食飽飽就開車去幾米廣場嘞。一路睇清楚路牌，有個小牌寫住幾米停車場。雖然係收費，但只係十蚊台幣一個鐘，豪俾佢啦。

幾米廣場好多遊客影相，當然未去到水洩不通，但都要排隊影相。馬Ｂ不斷擒放響地上的大行李箱。

之後去左宜蘭唯一商場－新月廣場。泊車唔成問題，個停車場都好大。個商場呢......唔, 有間誠品啦, 馬爸爸都買左本書。另外有一邊賣小朋友衫、鞋啦。其他舖頭唔係太吸引，我地都無行啦。之後落左去地庫先叫左碗麵餵飽馬Ｂ（因為佢響夜市應該無嘢食），跟住行埋家樂福，就出發夜市。

之前有朋友提過，夜市會好逼。所以我地安排平日去。丫，其實又ＯＫ喎，夜市隔離已有停車場 ，我地七點鐘到，都仲有位泊車。

抱住馬Ｂ，都唔可以慢慢行，因為佢成日扭落地。但人多，又有車仔檔，我唔俾佢，佢就發老脾～～宜蘭出名蔥，今次食左燒蔥羊肉串、蔥餅，同埋當歸羊肉湯，碗湯真係無敵好味。

宜蘭自駕遊 (2014)－第一天

我地返左黎啦。小馬Ｂ第一次搭飛機，好成功喎。我一直擔心起飛或降落時的氣壓會令佢唔舒服，好彩佢響飛機上，啜啜下奶樽都可以瞓著。太好啦！

今次去宜蘭四天，係自駕遊。一到桃園機場先唱錢同買電話上網咭，再食少少嘢。跟住租車公司就派人黎接我地到取車的地方。租車公司叫艾維士，出發前已訂定，啱啱Audi做緊推廣，四日租車，ＧＰＳ加遲還車總共約一萬台幣。但我就嫌車箱太細，我都係鐘意七人車闊落Ｄ。

響桃園去宜蘭，由國道一號到三號、五號再經雪山隧道，個半小時便到達，全程高速，唔駛入市區，好方便。住方面本來想揀一Ｄ親子民宿（如房內有滑梯個Ｄ），可惜問左幾間都已滿左。最後揀左一間叫晨露庄的民宿，響冬山個邊的，離羅東都只係五分鐘到車程。我地到達時，大概四點幾。屋主好好人，除左同我地介紹羅東夜市的美食外，仲響我地出發食晚飯前，特意整左少少嘢俾我地頂住肚餓。台灣人真係好有人情味。

第一日基本上無乜行程。安頓一下後，就開車去食晚飯。餐廳叫"客人城"，雖然話食物味道同賣相都唔差，但上菜同收碟速度直頭媲美快餐。有一下個姨姨又想黎收碟，我話未食完，佢竟然好老實咁叫我夾起先，因為唔夠碟用～～於是我地好趕咁食完個晚餐。

原來宜蘭真係一個好鄉下的地方。民宿四圍都係無嘢行的，黑麻麻。食飽飽返到去，都未瞓得覺架，除左梳洗外，仲要洗下馬爸同馬Ｂ的衫呢～～～羊媽媽真辛苦啊

BB旅行清單（夏天）－歲半

好緊張呀！今個星期日就會帶埋小馬出發去宜蘭啦。呢次將會係小馬人生第一次搭飛機，希望呢個零鐘，佢唔會唔舒服啦。

先分享預備好的ＢＢ清單（宜蘭天氣應該同香港差唔多，但就多雨）：

衣服：

外套(風褸＋棉)                                 (sports jacket + cotton jacket)

CAP帽                                                (cap)

出街面衫                                            (outdoor tee x8)

出街長褲                                            (outdoor pants x6)

鞋(波鞋＋涼鞋）                              (running shoes and sandals)

襪仔                                                    (socks x6)

瞓覺衫                                                (pyjama x2)

口水肩（即棄）                                (disposal bibs: two packs)

膠食飯衫                                            (plastic eating bib x1)

包被                                                    (blankets x2)

太陽眼鏡                                            (sunglasses)

汗巾                                                    (sweat towels x2)

雨褸                                                    (raincoat)

           

 酒店用：

睡袋                                                    (sleeping bag x1)

枕頭                                                    (bb pillow)

舊襪                                                    (old socks for wearing at hotel x2)

清潔/沖涼：

沖涼毛巾、紗巾                                (bath towel x2; facial towels x6)

BB洗衣液、晾衫架                           (bb washing detergent; hangers)

BB body wash/Body lotion, Facial cream, Barrier cream (travel set x1@)

防晒                                                    (UV cream)

棉花棒、詩思樂棉花                        (cotton sticks, cotton pads)

乾紙巾                                                (tissue)

濕紙巾/詩思樂濕紙巾                      (wet tissue)

消毒劑/抹布                                      (sterilizer; cleaning towels)

食物：

零食                                                    (snacks, e.g. biscuits)

開餐用品：

奶粉                                                    (milk powder 5oz, 8 packs)

奶咀                                                    (pacifier x1 for use on airplane)

吸管杯(水／奶)                                  (straw cups for milk and water)

保暖壼 (裝熱水用)                             (warm mug for hot water)

食具盒                                                (plastic lunch box for eating utensils)

餐具                                                    (bowls, spoons x2, forks x2, knife for fruits and scissors – must             check-in)

以上實有遺漏，再補充！

澳門三日兩夜遊(2013年12月)

第一次帶馬B出門, 係去澳門三日兩夜。呢次約埋其他同事, 包括超鐘意照顧小朋友的SamSam, 另外又租左架七人車周圍去, 過程總算順利。

日期: 2013年12月
酒店: 氹仔假日酒店
租車（第二、三天）: 成哥 (如同BB或老人家去, 超級推介)

行程:
第一日
11AM　中港城出發搭金光飛航，乘酒店專車到酒店先放下行李

午飯　　葡京酒店The Eight中菜廳（食物好，但真係太多... 人)

下午　　帶馬Ｂ返酒店沖涼和午睡，然後到酒店範圍逛逛

晚飯　　氹仔山度士葡國餐廳

注意事項：唉，帶住阿Ｂ出門，總係有好 le hea的時候，如上的士... 一手抱住BB,另一手拎住個袋, 落車後行左一陣, 發覺唔見左電話 (應該漏左響的士)。即係打番去,已熄左機~~~ 唉~~

第二日
早上　　司機成哥出場，先載我到附近警署報案，攞報案紙返香港claim保險

　　　　參觀主教山、瘋堂斜巷、媽閣

午飯　　媽閣 Pizzeria Toscana

下午　　路環石排灣郊野公園睇熊貓

　　　　大三巴

晚飯　　媽閣長城燒烤

第三日
早上　　先check out，將行李放上車

　　　　參觀盧家大宅

早飯　　新口岸滋味中國菜

下午　　禮記食雪糕

　　　　下午茶四季酒店afternoon tea set

　　　　五時多到碼頭乘船回港

預備行程時，見到有個氹仔大潭山滑草場，應該適合小朋友玩的。

10個月大BB旅行清單(冬天)

帶小朋友出門係好大的挑戰。尤其是第一次出門無經驗，要起碼預一整日執小朋友的行裝。謹記過程中保持心平氣和，因為當你好忙亂咁執拾時，若身邊有人唔知定講Ｄ無謂的說話，你係會好容易發癲的～～是真的～～

第一次帶馬B出門，係上年12月聖誕節前去澳門三日兩夜。當時馬B十個月大，又無食大人食物。佢的物品佔左大半個行李箱，執到出門口個刻都仲執緊....　以下清單中英對照，方便搵工人姐姐幫忙，但自己都要final check。

預先向酒店要求安排：

奶樽steamer

ＢＢ床

BB沖涼液/Body lotion, Facial cream, Barrier cream （酒店提供mustela旅行裝）

衣服/睡覺物品：

x 1  厚褸                                                       (thick jacket)             

x 1  厚外套                                                   (hoodie)      

x 1  冷背心 (方便室內活動)                        (knitted vest)

x 1  冷帽  (如天氣非常寒冷，帶埋手套）(knitted cap)

x 4   長袖打底衫                                           (bodysuit)                     

x 2   Uniqlo heatteach (衫＋褲）                  (heattech)

x 4   出街衫褲                                               (outdoor clothes)

x 1   鞋仔                                                       (shoes)

x 3   襪仔                                                       (socks)

x 1   酒店房穿的舊襪  (方便ＢＢ踩落地）(old socks for wearing in hotel room)

x 2   瞓覺衫                                                   (pyjamas)

x 1   包被                                                       (blanket)

x 1   睡袋                                                       (sleeping bag)

x 1   隔尿床墊                                               (waterproof mat)

　　    

清潔/沖涼：

x 2   沖涼毛巾                                               (bath towels)

x 6   紗巾                                                       (face towels)                 

BB洗衣液、晾衫架                                      (bb washing detergent; hangers)

棉花棒、詩思樂棉花                                   (cotton sticks, cotton pads)

乾紙巾                                                           (tissue)

濕紙巾                                                           (wet tissue: one box plus a few packs)

奶樽洗潔精、奶樽刷、盒仔(洗奶樽用)  (feeding bottles cleansers, plastic box)

消毒劑、抹布 (先清潔BB床)                       (sterilizer; cleaning towels)

奶粉和用品：

奶粉 (預多一日份量)                                     (milk powder)

(我買左旅行用的奶粉袋仔分好, 響街開奶都好方便)

x 3 / 4  奶樽                                                     (feeding bottles)

食物：

牙仔餅/星星餅/零食                                       (snacks)

水果：啤梨、蕉                                             (fruits, e.g. pears, banana)

米、蕃薯、節瓜、甘筍                                 (rice, sweet potato, hairy melon, etc.)

糊仔                                                                 (rice cereal)

開餐用品：

學習杯                                                             (learning cup)

旅行高速煲／麵煲（整粥仔用）                 (cooking pot)

保暖壼 500ml (裝粥用)                                   (warming pot for congee)

保暖壼 (裝熱水用)                                         (warming pot for hot water)

水壼 (裝凍水用)                                             (water bottle)

凍開水 (我帶左一枝以防萬一)                     (boiled water)

膠盒 (放所有已消毒餐具)                             (plastic box for eating utensils)

餐具－匙羮, 碗仔, 刀、較剪、食物研磨器

                                                                        (Spoons, bowls, knife, scissors, strainer, bowls)

x 10 口水肩（即棄, 若無整污糟，會重用) (disposal bibs) 

用品:
尿片(預多一日用量)                                      (diapers)
探熱針                                                             (thermometer)
膠布                                                                 (bandage)
BB車和雨擋                                                    (stroller and rain cover)
玩具                                                                 (toys)
保嬰丹／退燒藥／針筒                                 (medicine and feeding needle)

退熱貼                                                             (cooling gel)

指甲拑                                                             (nail cutter)

防蚊貼                                                             (mosquito repellent label)

安撫奶咀、奶咀夾                                         (pacifiers and holder)