北海道2015年7月自駕遊－第六至八天（札幌）

基本上最後三日無乜嘢寫，因為係shopping day。

第六日先去左北廣島的三井outlet。時值七月減價，所有嘢都好平好平好好平呀！如果唔係湊住馬Ｂ，可以再買多好多好多。

第七日先去左北海道大學逛逛。Hotel Gracery的地點其實好方便，不但四圍有好多商場，行去北海道大學都只係十分鐘。響大學食埋午餐，又返去ＪＲ站附近再買。我地一家三口落左地下街行下，買左少少護膚品，同埋薯條三兄弟。晚餐響地下街其中一間舖頭食天婦羅，再去Daimaru底層 LeTao 買定蛋糕做消夜。

第八日食完早餐就出發去新千歲 outlet。但我反而無乜買嘢，因時間無多，又要同馬Ｂ食午飯，又趕住兩點還車，我都只係響Beams執左兩件tee （好抵，港紙80蚊一件咋)

還完車就搭租車公司車返去機場，響國際線　check in 之後，租借左架BB車，我地返去國內線個邊食嘢、買嘢。行行下，馬Ｂ好快瞓著左，都無玩叮噹館。

部分手信

總結北海道真係好好玩，自駕遊超方便，食物又好，尤其遇上大減價時候，簡直唔想返香港！

北海道2015年7月自駕遊－第五天（青池、旭川、札幌）

離開美瑛富良野出發到旭川前，先去青池走一圈。根據網上資料，青池係新興的景點，因池水有礦物質，陽光映照下，變得藍藍綠綠，加埋池裏的枯枝，好一幅淒美的圖畫。青池有自己的停車場，泊好車行入去大概幾分鐘，圍住池邊行到盡頭，邊行邊影，大概半小時。

好啦，美瑛行程完結，出發去旭山動物園啦。入園玩之前，當然先去醫肚。

大概十一點幾去到旭川，食左青葉拉麵。check 左GPS, 發覺 Akachan童裝只係三分鐘距離，一於散Ｄ至出發睇動物。

（日本呢Ｄ大型童裝店係好可怕的，所以嘢都好可愛，足以敗你半副身家）

去到動物園，先響門口借用BB車。日本好好，借BB車響好多地方都唔駛登記。

（旭川當日氣溫都幾高，點解北極熊唔怕熱呢？）

（呢隻唔知係乜）

（海豹游水）

我地大概五點離開旭川，七點多到達札幌，好彩交通唔算太繁忙，好易搵到酒店 - Hotel Gracery。我地訂酒店時已叫 agent upgraded 左去大少少的房 (Hollywood Twins)，所以間房都好夠位開兩個喼，仲有活動空間。

出動搵嘢食時已唔早，我地去左Stella Place的根室花，點知仲排長龍。於是求其食左日本餐廳。今晚早Ｄ休息，聽日到outlet搏鬥！！

北海道2015年7月自駕遊－第四天（富良野）

今日的行程，原來係先去富田農場，再去麵包超人館，但一早起身，竟然落雨！咁就對調行程，先去室內的麵包超人館。

麵包超人館距離富田農場都有半個鐘，沿途無人無車，好似入左無人之境。但去到發覺好多車已泊左響度（絕對繁榮過美瑛）。入到去不斷嘩嘩聲，好多好多麵包超人呀！！

 （二樓有好多畫）

（出面有得玩水；好在我有帶套後備衫俾馬Ｂ）

玩完一輪，就過去隔籬的果醬工房。裏面賣不同味道的果醬，有得試完味至買。原來個度仲有間餐廳仔，提供咖喱同西餐。我地叫左一客炸雞，簡直係全世界最好味的炸雞，唔油，仲好juicy!!!

下午天公放晴，實在太好啦。立即開車去富田農場。富田農場比我想像中細，但超多人。我買左一束薰衣草預備放響車度香噴噴一下，點知俾隻馬豬仔攞黎當掃把玩！

本來預左要行半日，結果好快走人。咁加個行程去森之時計飲咖啡啦。因為時值黃昏，太陽伯伯已開始下班，又凍到我地打冷鎮。好在咖啡店有位，唔駛排（如要坐bar 枱自己動手整咖啡條隊，就要排好耐）。

（咖啡可以講唔好飲；另叫左兩件蛋糕，我覺得唔好食）

呢度的舖頭都好精緻，地下又舖晒樹皮方便行，夜晚開晒燈應該會好浪漫啊～～

今晚先響富良野食晚飯，免得返到美瑛又係無得食。

北海道2015年7月自駕遊－第三天（美瑛）

第三日先嘆完Dormy Inn早餐，再行去小樽駅的三角市場睇下。市場係一條有蓋短短的街，有幾間舖餐廳，其他海鮮檔基本上都係賣差唔多的食物，價錢亦一樣。我買左包乾帶子做手信，3300yen 好多粒。

本來想臨走前到酒店樓下的Le Tao買件蛋糕食，但可惜走前間舖都未開。唔怕，LeTao周圍到有，返札幌再試。

一路開車大概三小時到達美瑛。先去山頭火食碗拉麵醫肚，諗住好快有得食，但都等左好耐，因為得兩個煮麵師傅同一個樓面。

大概四點鐘，第一站先去四季彩之丘。鑑於太陽太猛，我又要照顧馬Ｂ，好靚的花田相欠奉。我們先租左間golf 車圍住花田暴走一轉 (因只租左15分鐘), 跟住再落車慢慢行。天氣十分好，藍天白雲。場內有個羊駝場，要收費(500 YEN), 我帶住馬B入去, 裏面好細, 有十隻八隻羊駝響圈內, 好可愛。有對香港夫婦好好人咁不斷幫我同馬B影相。多謝晒!!!

(當然去到每個景點都要加插購物時間，唔駛解釋。）

見仲有陽光喎，決定睇幾棵名樹至去酒店check in 啦。

Ken & Mary Tree (附近有停車位）

Mild Seven Tree  (附近都有停車位）

 親子之樹（路邊停低影幾張就走；好似直頭無落車～～）

返到酒店 check in 再出動搵嘢食，已差唔多八點。Hotel Lavenir 係用隔離的公眾停車場，位唔多，但都泊到，免費的。出動搵食已差唔多八點，好多舖頭已閂。最後搵到一間類似居酒屋食串燒，好食，老闆娘仲請我地食車厘子。可惜bar 枱的大叔狂扯煙，搞到煙霧彌漫，食完拿拿拿聲走人。

返到樸實無華的酒店，就好掛住Dormy Inn的消夜拉麵、牛奶、大浴場同美味早餐囉～～

北海道2015年7月自駕遊－第二天（余市、西松屋）

第二日的行程，就係驅車去離小樽約半小時的余市，目標係山本果園同Nikka Whisky。

不過先要講講，Dormy Inn早餐真係無得輸。除左一般早餐自助餐有的食物之外，最吸引的，係自助海鮮井；仲有超脆紫菜包飯食，我以後食唔番點算呀～～

講返當日行程。七月初只有車厘子可以摘。如果帶小朋友去北海道，呢個係好好的活動，連馬Ｂ都摘得好開心，邊摘邊吃，食到唔捨得走。我地只係任食，無加外帶。（當日係好夠皮，但返到香港回想，就覺得點都要買盒，因為真係好好食，尤其係佐藤錦）。

完成小朋友的活動，就到大人的活動－威士忌廠 。為左讓司機爸爸有時間消化酒精，我地一到就直奔試飲場。裏面人山人海，可以試飲三種－余市十年、super同蘋果酒。但我都係鐘意飲梅酒多Ｄ。

午餐去左酒廠附近一間食海鮮的地方（海鮮工房），我碗白海膽飯不得了！入口即溶，即好味，但因為等位等左好耐，等上菜又等左好耐，無影相。

有入（食），當然有出（錢），返回小樽西松屋大～出～血～～～

北海道2015年7月自駕遊－第一天（小樽）

出發啦！乘搭早上八時國泰直航機出發啦！早餐響travel lounge到食，但得15分鐘，又要開奶俾馬Ｂ，我自己都唔係食好。一如以往我 order 水果餐，又為免小童飛機餐唔好食，我買定個包包上機，馬Ｂ一見到就要食～～　好彩佢響機上訓左個零鐘，如果唔係唔知點捱～～

兩點前去到新千歲機場，過關排左好耐，又等行李。決定未去攞車前，先醫下個肚。由國際線行去國內線（好近），餐廳位於二樓，真係花多眼亂。我地最後揀左豚肉井。好好食呀！

食飽飽就去租車。Orix同其他租車公司的counter響國內線一樓。出發前已網上預訂，去到就加租etc, Hokkaido Highway Pass同insurance。呢部就係陪左我地八日的stepwagon；好新淨的。

行程第一站係小樽。一到埗發覺比想像中凍（我直頭覺得好凍），後悔無帶件厚褸俾馬Ｂ，只有一件夾棉背心。住的地方係小樽駅對面的 Dormy Inn，隔離有三角市場，行去運行都只係十分鐘，另房間乾淨、有浴場、有海鮮井早餐、有免費消夜拉麵！十個推薦。

行去運河途中，經過景點之一：宮手線跡。

到達運河，室外溫度15.8度。

是日晚餐去左運河斜對面的出拔小路搵嘢食。其中一間食燒烤，唔知咩名，裏面無人，但好有深夜食堂feel。我地叫左雞翼、帶子、菇等，加埋杯好飲梅酒，大滿足。可惜食飽飽後，其他舖已關門，無緣試食。

返到酒店，馬爸爸先去浴場再食拉麵，然後到我去嘆。

北海道自駕遊－序

問（馬Ｂ）：你搭過飛機未呀？
馬Ｂ：搭過！
再問：搭過去邊呀？
馬Ｂ：台灣、新加坡！

馬Ｂ，七月之後，答案要改啦，會變成"台灣、新加坡、北海道!"

無錯，繼二月去完新加坡之後，北海道之旅又預備開始啦。為避開peak season, 我地選擇七月初去。花，應該無七月中開始咁靚，但希望都有嘢睇啦。

行程如下：

第一日：香港到札幌，先攞車直驅小樽（租車公司：格安）
第二日：小樽到余市（摘車厘子）、積山半島（海膽飯）（酒店：Dormy Inn Premium Otaru)
第三日：旭川動物園、美瑛 (酒店：Hotel Lavenir; 本來想訂民宿，但好多都滿左）
第四日：美瑛、富良野
第五至八日：札幌（酒店：Hotel Gracery Sapporo; package包三晚，但唔可以拆開住，唯有安排回程住，唔駛拎住戰利品周圍去）

鑒於上次新加坡四個鐘頭機馬Ｂ一分鐘都無瞓到，我要預備定多Ｄ新玩具，等佢消磨呢五個鐘。

北海道我黎啦！！！

新加坡2015年2月－Day 5

今日其實超無聊。有朋友話有間買蛋糕好好食，響Bugis 附近，咁我地朝早執好嘢，玩多次水就搭的士出去。去到Bugis落車，再行。行呀行呀，行到腳拐，終於見到，但無！開！門！

又熱又攰又餓，又已過午飯時間（好多舖頭已閂門），好彩搵到間食嘢。食完拿拿聲出去搵的士返酒店。天啊，等左好耐先截到架的士，飛返酒店，馬爸爸衝入酒店攞返行李，再上番的士飛去機場，好彩無遲到～～～

到機場馬Ｂ最開心見到乜嘢？當然係車，或車類物體，如機場拖行李車的車，佢開心到要同車合照～～睇下佢笑得幾sweet!

但最後一日，就白白過左去啦

返到屋企已夜晚１１點幾，放左熟睡的馬Ｂ上床，一同佢除片，佢就wee wee，又要換衫又換床單，你係唔係驚我太得閑太唔攰呢？？

新加坡2015年2月－Day 4

今日的行程係去Gardens by the Bay。幾日都無好嘢食，lunch就先去vivo city間無招牌食白胡椒蟹。蟹好食，但其他餸一般。

下晝三點幾到左公園（仲係超曬，馬Ｂ又唔肯戴帽，激死）。門票包Flower Dome, Cloud Forest同skyway。

響Flower Dome行到攰攰地，有間cafe仔食左件蛋糕，再去Cloud Forest。呢度真係好impressive，一入去個瀑布已好震撼，仲可以搭電梯上到最高，再行落黎。（噢，掛住睇實馬Ｂ，我自己無影相添～～）

到差不多日落前，就行Skyway，咪話唔驚呀，我自己又怕高，馬Ｂ又要自己行唔俾拖，典地又盛～～skyway出口係一個小草地，我地二話不說就攤響草地瞓等supertree開燈。期間，馬Ｂ不斷執樹葉塞落我個口。天啊，可唔可以俾番少少時間我休息下呢，大少～～～

 去到Gardens By the Bay, 最大感受係，如果香港都有咁靚的地方，又有咁brilliant的設計就好啦。唔好一味有地就起樓啦～～我地有咩地方令香港人好自豪？sorry, 諗唔到

新加坡2015年2月－Day 3

今日出遠門，哈哈，去River Safari 同 Singapore Zoo。原來兩個地方真係孖住（同一個入口），再過Ｄ就係Night Safari 。

先去River Safari，俾我想像中好，因為好多室內地方，yeah，有冷氣唔怕曬。但謹記要帶多件外套，因為冷氣好凍，一出一入好易病（馬爸爸就係咁病左～～）。裏面有大魚呀、細魚呀咁啦。仲有俾左幾蚊坡紙坐車車，但我地無坐船，唔知點解呢？

響熊猫餐廳食左個午餐，就過去動物園，但馬Ｂ瞓著左，我地求其坐低hea住等佢起身。記住門票要Keep 好，因為坐shuttle 時，要show票。我上車個下搵極都搵唔到，好彩個職員俾我地上車。

因為馬爸爸凍親，夜晚無出街食（另外要記住帶panadol，並隨身帶定兩粒。Zoo出面的便利店係無得買的，職員亦無，最後要返返酒店個gift shop至用十幾蚊坡紙買到一盒）。響酒店叫room service，你睇馬Ｂ食得幾開心！食薯條識得叫我俾茄汁佢～～～