新加坡2015年2月－酒店篇

新加坡係我以前每年必遊的地方，除左係因為有個死黨嫁左去個邊，另外，我覺得新加坡好乾淨、安全。當然無日本咁吸引，但如去個短假期，行下食下都唔錯。

馬Ｂ出年２月２３日會足兩歲，諗住機票會平Ｄ，所以決定佢生日前安排個旅行。我地的機票係asiamile換，而但最後我地都決定用mileage換多張機票俾佢，如果唔係要抱足四粒鐘都咪話唔攰～～

搵酒店方面，因為同馬Ｂ一齊去，唔會考慮boutique hotels。而家用online booking的好處，係可以隨意改或取消預訂（價錢俾non-refundable的會貴，但對於有小朋友的家庭黎講，我覺得保險Ｄ，因為小朋友隨時病，咁就算要取消個旅行，都唔會咁肉痛）。

呢幾個月，我地一直改來改去，曾經訂過的酒店有幾間：

Park Royal on Pickering:
http://www.parkroyalhotels.com/en/hotels-resorts/singapore/pickering.html

呢間我地一早訂左，響位置同酒店設計上真係好吸引，好潮好乾淨。網上的評分亦好高。唯一唔好係貴～～我地訂新年前一個星期，四晚要一萬蚊港紙。

後來馬爸爸想去resort hea下。去Bintan又費時失事，不如入Sentosa住啦。Sentosa有好多酒店，我地睇過呢幾間：

Moevenpick Heritage Hotel Sentosa
http://www.moevenpick-hotels.com/en/asia/singapore/sentosa/hotel-singapore-sentosa/overview/

價錢OK，地點都好似好方便。但佢個泳池似乎弱左Ｄ，係一個大浴缸咁，好唔吸引

Siloso Beach Resort
http://www.silosobeachresort.com/

呢間有朋友住過，超平，六千蚊唔駛有四晚，酒店對出就係Siloso海灘。但房間超細，網友分享話Ｄ被舖都好似好潮濕咁，我會瞓唔到囉

Shangri-la Rasa Sentosa Resort
http://www.shangri-la.com/singapore/rasasentosaresort/

山卡啦喎，當然係正啦，價錢要over 3K一晚。但所有嘢都好吸引，出去係海灘，酒店內的設施亦多，如果四日留響酒店的時間多，真係未嘗不可喎。最重要的，馬爸爸竟然話Book lor！嘩，即刻訂！

新加坡2015年2月－機票篇

回顧番呢幾年去的旅行，除左上次去宜蘭係響CX Fanfare買的特價機票，大部分都係用mileage換的。今次去新加坡都唔例外。

馬Ｂ回程仲未過生日，其實可以唔駛買自己座位的機票。但諗起幾個鐘要抱住佢，都咪話唔辛苦，於是我地就用mileage換多張機票俾佢。網上大家都話ＣＸ的小童機票其實唔平，除左係計成人價錢再打折，另仲要俾稅。如成人的稅約八百蚊，小童都要五百幾。

另外，馬Ｂ個張係後加的，我叫Asiamile務必將佢同我地劃埋一齊坐，我至會確認出飛（無理由唔一齊坐我都出飛啦）。點知，佢竟然話唔可以（？！）就算佢明白呢一張係出俾ＢＢ，都唔得。咁奇～～？！（咁點解我地出自己個張又劃到位呢？唔明）

咁我都唔浪費時間同佢嘈，我自己打去CX, 同佢講已響Asiamile度換左機票，只係差出飛，但想make sure我地三個一齊坐。CX立即幫我mark左位，仲訂埋兒童餐添！

我呢，就唔食飛機餐的。我訂左水果餐，另外自己再帶三文治或壽司上機食，或去到機場買burger。